ဤသို့ဖြင့် … သူ၏ လုပ်ကြံဖန်တီးမှု ဇာတ်ကွက်ကို စတင်အကောင်အထည်ဖေါ်လေ တော့၏။အရှင်မင်းကြီး သာမာဝတီတို့အုပ်စုဟာ ပြင်ပနှင့်အဆက် အသွယ်ပြုပြီးတော့ အရှင်မင်းကြီးကို နန်းချဖို့ စီမံနေပါတယ်၊ သက်သေ အထောက်အထား ကတော့ သူတို့စံနန်းတော်ရဲ့ နံရံတွေမှာ အပေါက်များစွာ တွေ့မြင်နိုင်ပါတယ်။တကြိမ်မက နှစ် ကြိမ် မက၊ လာပြန်ပြီး နောက်တစ်ကြိမ် ဘုရင်မင်းကြီး မယုံကြည်လျှင် ကိုယ်တိုင် ကြည့် ရှု တော်မူပါဟု . ပြောပြန်လေပြီး။
ဘုရင်မင်းကြီးသည်၊ မတတ်သာတော့ မကြည့်မခြင်း ခဏခဏ ပြောနေလေတော့ နားလေးမှအေးအေးဆိုပြီး ( မာယာဥာဏ်သုံးနေသော) မာဂဏ္ဍီအလိုကျ သာမာ ၀တီ၏ နန်းမဆောင်သို့ သွားကြည့်ရတော့၏ပြောသည့်တိုင်းပင် နံရံ၌ အပေါက်များကို တွေ့ရပါပြီး၊ သို့သော် (မစူးမစမ်း မလုပ် ) အကြောင်းရင်းကို သိရန် နံရံအပေါက်ဖေါက်
ရခြင်း၏ အကြောင်းကို မေးကြည့်၏၊ ထိုအခါ “လမ်းညွန်မှု ဓမ္မ ” ကို ပေးတော်မူသော ကြောင့် ဓမ္မရာဇာ ဖြစ်တော်မူသော ဘုရားရှင်နှင့်သံဃာတော် များကို ( အပြင်ထွက် ဖူးခွင့်မလွယ်၍ )နံရံပေါက်မှ ဖူးမြင်ကြကြောင်း အဖြစ်မှန်ကို တင်ပြကြ၏၊ အဖြစ်မှန် သိရသောအခါ ဘုရင်မင်းကြီးသည် နံရံပေါက်များကို ပိတ်စေ၏၊ ထို့နောက်တော့ လှပသပ်ယပ်သော လေသာတံခါးများကို တပ်ဆင်ပေးတော့၏၊ စိတ်တိုင်းကြ ဖူးစေ ပူဇော်စေရန် ဖြစ်၏။( ဘာသာရေးကို လွတ်လပ်စွာ ကိုးကွယ်ခွင့် ပြုလိုက်ခြင်းဖြစ်၏)
မာဂဏ္ဍီပစ်ချက် လွဲသွားပေပြီ၊ သာမ၀တီတို့အဖို့တော့ အမြတ်ပင် ထွက်လိုက်သေး၏၊ လွတ်လပ်စွာ တံခါးပေါက်မှ ဖူးမျှော်ပူဇော်ခွင့် ရသွားပြီးမဟုတ်ပါလား။
အင်း ဒီတခါ “ သမဏ ” အလှည့်ပဲ၊ မာဂဏ္ဍီသည် ဘာသာမဲ့ ဘာသာခြားများကို ငွေပေး၍ ရှင်တော်မြတ်သွားလေရာ နောက်မှလိုက်၍ “ ကြမ်းကြမ်းတမ်းတမ်း ”ဆဲခိုင်း တော့၏။ ဆဲနည်းကတော့ စုံလှ၏ “ သူခိုးကြပိုးတွေ လူဆိုးလူမိုက်တွေ လူအတွေမြည်း တွေ နွားတွေ ကုလားအုပ်တွေ ငရဲသားတွေ တိရစ္ဆာန်တွေစသည် စသည် ” သူတုိ့ ပါးစပ်ထဲ တွေ့သမျှ ဆဲရေးကြတော့၏
သွားလေးရာ အဆဲနောက်ကပါနေတော့၏၊ အရှင်အာနန္ဒာ မနေနို်င်တော့ နယ်ပြောင်းဖို့ ဘုရားရှင်ကို လျှောက်ထားရတော့၏၊ ဘယ်ကို သွားကြမလဲ အာနန္ဒာ၊ တခြားမြို့ကိုပါ မြတ်စွာဘုရား၊ အဲဒီ မြို့က ဆဲပြန်ရင်ကော နောက်တစ်မြို့ပါဘုရား၊ နောက်တစ်မြို့ ဆဲပြန်ရင်ကော အခြားတစ်မြို့ပေါ့မြတ်စွာဘုရား ၊ အာနန္ဒာမသင့် အာနန္ဒာ မသင့်၊
စစ်မြေပြင်ထွက်သော ဆင်ပြောင်ကြီးသည် အရပ်လေးမျက်နှာမှလာသော “ လေး မျှား လက်နက် ” တို့ကို သည်းခံနိုင်စွမ်းရှိသကဲ့သို့ ဘုရားရှင်တို့မည်သည်လည်း သီလမဲ့သူ တို့၏ ဆဲဆိုကြိမ်းမောင်းသော စကားမျိုးစုံတို့ကို သည်းခံနိုင်စွမ်းရှိ၏။ “ အာနန္ဒာ အဓိ ကရုဏ်းဆိုတာ ဖြစ်တဲ့နေရာ ငြိမ်းအောင် ငြှိမ်းနိုင်ရတယ် ”မစိုးရိမ်လင့်အာနန္ဒာ “ ၇ ” ရက်ကျော်ရင် ဆဲဆိုသံများ သူ့အလိုလို ပျောက်သွားပါလိမ့်မယ်၊ ( ယင်းမိန့်ကြား ချက် ကို အခြေခံ၍ မြန်မာ့နယ်ပယ်၌ ချီးမွမ်း ၇ - ရက်၊ကဲ့ရဲ့ ၇ - ရက်ဟု ပြောဆိုကြ၏ )၊ မိန့်တော်မူသည့်အတိုင်းပင် ၇ -ရက်လွန်သော အခါ ဆဲဆိုသံများ မကြားရတော့။
ဘုရားရှင်သည် ကောသမ္ဗီမှာပင် ဆက်လက်သီတင်းသုံးနေဆဲဖြစ်၏၊ဘုရားမနိုင် သော အခါ သာမာဝတီတို့ကို (ဘုရားရှင်ကို ထောက်ပန့်သောထောက်တိုင်အဖြစ် သတ်မှတ် ကာ ) ဆက်လက်ရန်ရှာလေတော့၏။
ဘုရင်ဥတေနသည် မာဂဏ္ဍီ၏ဦးလေးကို သူ့အလိုကျ မူးယစ်ဝန်ကြီးဋ္ဌာန အကြီးအကဲ အဖြစ် ခန့်အပ်ထား၏ ( သူ့ဦးလေး၊ သူ ၊နောက်ပြီး အလုပ် အကျွေး ၊သုံးဦးဇာတ် ကြို တင် တိုက်ထား၏။ သာမာဝတီကို အကောက်ကြံရန်ဖြစ်၏ )မာဂဏ္ဍီ မာယာဥာဏ် ထပ်သုံးပြန်လေပြီး၊ ဘုရင့်အနား မာဂဏ္ဍီ ရှိနေချိန် သူ့ဦးလေးသည်ဘုရင်မင်း အတွက် ဟု ဆိုကာ ကြက်အရှင် ( ၈ ) ကောင်လာရောက်ဆက်သလေ၏၊ မာဂဏ္ဍီက အဆင် ပြေတာပဲ သာမာဝတီတို့အုပ်စုဘာအလုပ်မှ မရှိ၊လှည့်သွားနေကြတယ်၊ သူတို့ကို ဘုရင် မင်းကြီးက ကြက်သားသုပ် ဆက်သခိုင်းရင် အဆင်ပြေမယ်၊ ဘုရင်မင်းကြီးသည် အလုပ်အကျွေးငယ်ကို သွားပို့ခိုင်းလိုက်၏။ သာမာဝတီနှင့်တကွ ရံရွှေတော်တို့သည် သောတာပန်များ ဖြစ်ကြ၏၊ သောတာပန်တို့မည်သည် ငါးပါးသီလ ဖျက်ရိုးထုံးစံမရှိ၊ ပျက်ရိုး ထုံးစံမရှိပေ၊ အသက်သာစွန့်မယ် သီလမစွန့်သူများဖြစ်ကြ၏။ထို့ကြောင့် သူတို့
သည် သူ့သက်သတ်သူများ မဟုတ်၍ ကြက်သားသုပ်ဟင်းလျှာ မချက်နိုင်ကြောင်း မဆက်သနိုင်ကြောင်း “ ငြင်းပယ် ” လိုက်ကြ၏၊
(မာဂဏ္ဍီဘက်သားဖြစ်သော ) အလုပ်အကြွေးငယ်သည် ဘုရင်မင်းကို ပြန်၍ သူတို့ ချက်၍မဆက်သနိုင်ကြောင်း လျှောက်ထားလေ၏၊ ထိုအခါ မာဂဏ္ဍီကဒီကြက် ၈ - ကောင်ကို ယူသွား ရဟန်းဂေါတမကို ( မာဂဏ္ဍီ၏အသုံးအနှုံး )ချက်ပို့လို့် ဘုရင်ကြီးက မှာလိုက်တယ်လို့ပြော၊ အလုပ်အကြွေးငယ် နောက်တစ်ခေါက်ထပ်သွားရပြန်၏ ဘုရင့် ရှေ့ ယူသွားစဉ်က“ ကြက်အရှင် ” ဖြစ်၏၊ သို့သော်ဘုရင်ကွယ်ရာ၌ ကြက်အသေနှင့် လဲ ပြောင်းကာ သာမာဝတီတို့ထံ ပိုလေ၏၊သောတာပန်သည် သူတစ်ပါးအသက် မသတ် သော်လည်း (အသက်မဲ့ ) ပံသုကူသားဆိုလျှင်ကား ချက်ပြုတ်စားသောက်ပါ၏၊ ထို့ကြောင့် ယခုပို့လာသောကြက်များသည် “ အသေ ” များဖြစ်၍ လက်ခံကာ ဘုရားရှင်ထံ လက်သုပ်ဟင်းလျှာအဖြစ်စီစဉ်၍ ပုို့လိုက်ကြ၏၊ယင်းအကြောင်းကို ပြန်လည် သံတော်ဦးတင်၏၊ ထိုအခါ မာဂဏ္ဍီက ကိုယ်တွေ့သိရပြီးမဟုတ်လား အရှင်မင်းကြီး မင်းကြီးအတွက်တော့မချက် ရဟန်းဂေါတမအတွက်ဆိုတော့ ချက်တယ်၊ ဒါ မရိုးသားတာပဲ၊နန်းတွင်းမှာနေပေမဲ့ နန်းပြင်ကိုတောင့်တနေတယ် အချိတ် အဆက် လုပ်နေတယ်ဆိုတာ ပြသနေတာပဲ ဟု နာနာနှင့်သာသာလေး တွန်းအားပေးပြန်၏၊ ဘုရင်သည် သူ့စကား မယုံ၊ တုပ်တုပ်မျှပင် မလှုပ်ချေ။
မာဂဏ္ဍီကား ရန်ငြိုးကြီး၍ ဇွဲကြီးသူလည်း ဖြစ်၏၊ ထို့ကြောင့် နောက်တစ်နည်းကြံပြန်၏၊
“ မကောင်းတူ ဆိုးဖက် ” သူ့ဦးလေးကို အကူအညီတောင်းပြန်လေပြီး၊အစွယ်ချိုးပြီး သား
( အဆိပ်မဲ့ ) မွေဆိုးတစ်ကောင် သူ့ဆီပို့ပေးဖို့ ဖြစ်၏၊
နက်ဖန်သဘက်ဆိုရင် ဘုရင်ဥတေနမင်းကြီးသည် သာမာဝတီအဆောင်သို့ ပြောင်း၍ စံတော်မူမည်ဖြစ်၏၊ အရှင်မင်းကြီး နှမတော် ညကအိပ်မက်ဆိုးတွေ မက်တယ် (လုပ်ကြံပြောချင်းဖြစ်၏)၊ စိတ်တွေလည်းလေးလံနေတယ်အရှင်မင်းကြီး တစ်ခုခုဖြစ် မှာကို နှမတော်စိုးရိမ်မိတယ်၊ဒါကြောင့် သာမ၀တီအဆောင် မကူးပါနှင့်လား ။စိုးရိမ် ပိုမနေပါနှင့် မိဖုရားကြီးရယ်၊ ဘာမှ မဖြစ်ပါဘူး၊ တား၍ရမည်ဟုတ်ဟု သိသောအခါ ဘုရင်မင်းကြီးမသိအောင် ဘုရင့်စောင်းပေါက်ထဲသို့ မြွေဆိုးကို ထည့်၍ ပန်းကုံးဖြင့် ထွက်မရအောင် ကြိုတင်ပိတ်ထားလေတော့၏၊
ဘုရင်မင်းကြီးသည် သွားလေရာ သူ၏ “ ဟတ္ထိကန္တ” စောင်းတော်ကို အမြဲတန်း ဆောင်ယူသွားလေ့ရှိ၏၊ ယင်းစောင်းဖြင့်ဆင်များကို လိုသလို စေစားနိုင်၏၊ ရှေးခေတ် က ဆင်ရှိလျှင် အင်အားကြီးနိုင်ငံ အင်အားကြီးအင်ပါယာအဖြစ် အသိအမှတ်ပြုကြ၏။
ဘုရင်ဥတေနသည် သာမာဝတီနန်းမဆောင်သို့ ရောက်ခဲ့ပေပြီး၊ သူ့ကို စိတ်မချဟုဆို ကာ မာဂဏ္ဍီသည်လည်း လိုက်ပါလာ၏။လိုက်မလာဖို့ ဘုရင်ဥတေနက တားတော့ တားသေး၏၊တားမရ၍ လိုက်ပါခွင့်ပြုလိုက်ရ၏ဘုရင်မင်းကြီးသည် သာမာဝတို့ ဆက် သသော အ၀တ်နံ့သာပန်းတို့ကိုဝတ်ရုံဆင်မြန်းလျှက် စားကောင်းသောက်ဖွယ်တို့ကို သုံးဆောင်ပြီးလျှင် စောင်းကို ခေါင်းရင်းမှာတင်ထားကာ စက်တော်ခေါ်လေတော့၏။
ထိုအချိန် မာဂဏ္ဍီသည် ဟိုယောင်ယောင် ဒီယောင်ယောင် လှည့်သွားပြီး စောင်းနား ကပ်ကာ ပန်းကုံးကို ဖယ်ရှားလိုက်တော့၏၊( သူ၏ရိုက်ချက် တိုက်ကွက် စတင်လေပြီ၊) နှစ်ရက်သုံးရက် အစာမစားရပဲ လှောင်ပိတ်ခံထားရသည်ဖြစ်၍ မြွေကြီးသည် မာန်ထ ကာ ကြောက်လန့်စရာ ကောင်းလောက်အောင် ပါးဖျဉ်းထောင်လေတော့၏၊ မာဂဏ္ဍီ သည် အထိတ်တလန့်ဖြစ်အောင် အော်လေတော့သည်၊ အကြံပက်စက် ရက်စက် လိုက်တာ သာမာဝတီရယ်၊ ဘုရင့်ဆီက ဘာများမရလို့ဒီလိုအကြံမျိုး ကြံစီရတာလဲ၊ အပြင်မှာ မျှော်လင့်ချက်တွေ ရှိနေလို့လား။ဘုရင်မရှိမှ သင့်တို့က စိတ်ချမ်းသာမှာလား၊
အရှင်မင်းကြီးကလည်း အိပ်မက်ဆိုးတွေး မက်လို့ မသွားပါနှင့်လို့ တားတာ တားမ ရဘူး၊ ခုတော့ “ ကံသီပေလို့ ” ပေါ့၊ နှမတော်သာ အသိမစောရင်ခုချိန်ဆို မတွေး ရဲစရာပဲ စသည်ဖြင့် အပြင်တင်လိုက် ကြိမ်းမောင်းလိုက်လုပ်နေတော့ သည်၊ ဘုရင်ဥတေနသည် မြွေကြီးကို ကြည့်၍ တော်တော်ပင် ထိတ်လန့်သွား၏ထို့အတူ သူ၏ ဒေါသသည်လည်း “ ငယ်ထိပ် ” ထိ ရောက်လာပေပြီးအင်း သာမာဝတီ ဒီလို လုပ်ကြံမယ်လို့ မထင်ရဘူး မထင်မိဘူး၊ အရင်တုန်းက နံရံအပေါက်ဖေါက်တာ ကြက်သားဟင်းလျှာသုပ်လုပ်ခိုင်းတုန်းက ငါ့အတွက်ငြင်းပယ်တာ ငါ သဘောထား ရိုးရိုးလို့ ထင်ခဲ့တာယခုတော့ သူ့မကောင်းကြံ ရေပေါ် “ ဗူး ” သလို ပေါ်လာခဲ့ပေပြီး။
( သံသယ ၀င်လာပြီဆိုလျှင် အရာရာကို အကောင်းမမြင် အကောင်း မထင်တော့၊ ဤသည်မှာသဘာဝဖြစ်၏၊)
သာမာဝတီတို့ငါးရာလုံးကို တန်းခိုင်းလိုက်၏ ရှေ့တည့်တည့်ကြည့်ရင်တစ်ယောက် တည်း ထင်လောက်အောင်ထိ ဖြောင့်အောင် တန်းခိုင်းထား၏ပြီးတော့ ဗိုလ်ခြေ တစ်ထောင်တင် သူ၏ လက်သုံးတော်မျှားကို ပြင်လေတော့၏၊သာမာဝတီနှင့် ရံရွှေ တော်ငါးရားလုံးကို တစ်ချက်တည်းဖြင့်အပြတ်ရှင်းရန် ဖြစ်၏။
မာဂဏ္ဍီ၏ အကြံအစီမှန်း သာမာဝတီသိ၏၊ သို့သော် ရှင်းပြရန် ခက်နေ၏၊ (မာဂဏ္ဍီက တစ်ကွက်ကြိုတင်ထားသည် မဟုတ်ပါလား ) သာမာဝတီသည် သူ့ရံရွှေတော်များကို လမ်းညွန်နေ၏၊ ငါတို့သည် “ မေတ္တာမှတစ်ပါး ” အားကိုးစရာ မရှိ၊ မမြင်၊ “ မာဂဏ္ဍီ မင်းကြီး မိမိ ” တစ်သားတည်း ဖြစ်စေရမယ်၊မိမိနှင့်တန်းတူထားပြီးတော့ မေတ္တာ ပွါးကြရမယ်၊ မာဂဏ္ဍီ မင်းကြီး ဘယ်သူ့အပေါ်မှ ဒေါသမထွက်ရဘူး မေတ္တာ မပျက်ရဘူး၊စကားသံတိတ်သွားတော့၏၊ သူတို့အလုပ်သူတို့ စတင်လုပ်နေကြပြီး
ဖြစ်၏၊ သူတို့၏ကိုယ်၌ မေတ္တာများ လွှမ်းခြုံနေပေပြီ။(မာဂဏ္ဍီသည် ပြုံးနေ၏၊ဒီတစ်ခါ
တော့ ဘာတတ်နိုင်သေးလဲဟူသော အတွေးဖြင့် ပြုံးနေခြင်းဖြစ်၏ )
ဘုရင်ဥတေနသည် အဆိပ်လူးထားသော မျှားကို လေးညှို့သို့ တင်လိုက်လေပြီ၊ ထို့နောက် သာမာဝတီ၏ ရင်ဝတည့်တည့် ချိန်လျှက်အဆိပ်လူးမျှားကို ပစ်လွှတ် လိုက်လေတော့၏ ..
ထိုအခါ … ဒေါသအဟုန် လေးညှို့အဟုန်တို့ကြောင့် အရှိန်ပြင်းစွာ“ တာ ” ထွက်လာသော မျှားအဟုန်သည်လည်း အရှိန်ပြင်းလှ၏၊
လူကို မဆိုထားဘိ အင်အားကြီး ဆင်ကိုလည်း ဘုန်းကနဲ လဲကျစေနိုင်၏၊ သားသမင် ကိုလည်း ဘိုင်းကနဲ လဲကျစေနိုင်၏၊ အလွန်မာကျောသည့် ကျောက်စိုင်ကျောက်သား ကိုသော်မှာ ထိုးဖေါက်နိုင်စွမ်းရှိ၏၊သို့သော် ဒေါသအရှိန် လေးညှို့အရှိန်ကြောင့် အရှိန်ပြင်းစွာမောင်းတင်လာသော “ အဆိပ်လူးမျှား ” သည် သာမာဝတီနှင့်ရံရွှေ တော်ငါးရာတို့၏ နှလုံးသားကို မထိုးဖေါက်နိုင်ချေ၊ ဤသည်မှာ သူတို့၏ စူးရှသော မေတ္တာတံတိုင်းကြောင့်ဖြစ်၏၊ မေတ္တာတရားသည် ရန်သူကို ကာကွယ်ရာ၌ ကျောက်စိုင်
ကျောက်သားထက် မာကျောသည့် သဘောတရားကို ဤနေရာ၌ တွေ့မြင်ရပါ၏အရှိန် ဖြင့် ကန်လွှတ်လိုက်သော “ ဘော့လုံး ” သည် မာကျောသည့် နံရံကို ထိမှန်သည့် အခါ နောက်သို့ အရှိန်ဖြင့် ပြန်လည်တွန်းကန်လာသလို ဘုရင်ဥတေန ပစ်လွှတ်လိုက်သည့် အရှိန်ပြင်းစွာ ပြေးဝင်လာသော “ အဆိပ်လူးမျှားသည်လည်း ” မိဖုရားခေါင်ကြီးသာမာ ၀တီနှင့် ရံရွှေတော်ငါးရာတို့၏ (ဘုရင် - မာဂဏ္ဍီ - မိမိ - သုံးဦးကို တပြေးညီ ပို့လွှတ်နေ သော ) မေတ္တာတံတိုင်းကို ထိမှန်သည့်အခါ အရှိန်ဖြင့်ပင် မျှားပစ်သူဥတေန ရင်ဝဆီသို့ မျှားဦး ပြန်လှည့်လာတော့၏
ဘုရင်ကြီးသည် ထိန်လန့်ခြင်း တုန်လှုပ်ခြင်းအတူ အံအားသင့်သွား၏ ထို့နောက်တော့ အံသြသွား၏၊ သူ့တစ်သက်နှင့်တစ်ကိုယ် မကြုံဘူးသည်ကိုကြုံနေရ၏၊ မမြင်ဘူး သည် ကို မြင်နေရ၏။ သူ့အတွက်တော့ “ မျက်လှည့်ပြပွဲ ”ကြည့်လိုက်ရသလို ဖြစ်နေ၏။
သွေးသားနှင့်တည်ဆောင်ထားသည့် ခန္ဓာကိုယ် မဆိုထားဘိ၊ သွေးသားမဲ့ ကျောက်စိုင် ကျောက်ခဲကိုသော်မှလည်း သူ၏ အဆိပ်လူးမျှားသည် ထိုးဖေါက် နိုင်စွမ်းရှိ်၏ယခုတော့ မျှားဦသည် “ ပစ်မှတ်သို့ မသွား ” ပစ်သူသို့သာ တဖန်ပြန်လာနေ၏သက်မဲ့ဖြစ်သော မျှားသည် မိဖုရားကြီးတို့၏ ဂုဏ်ကျေးဇူးကို သိပါလျှက် သက်ရှိဖြစ်သော ငါသည်ကား မိဖုရားခေါင်ကြီး၏ ကျေးဇူးဂုဏ်ကို မသိသူ ဖြစ်ခဲ့ချေပြီးတကား ၊ သူ၏ အသိဥာဏ် သည် လိုက်မမှီတော့ တွေဝေသွားတော့၏၊ အသိဥာဏ်အမြင်သာမကမျက်လုံးအမြင်ပါ မကြည်လင်တော့သည့်အတွက် အရပ်မျက်နှာတို့သည်လည်း မှုန်ဝါးသွားပေပြီ၊ မသဲ ကွဲတော့ ၊ သူသည် အမှောင်ထုထဲ ရောက်နေသူပမာ သဲကွာစွာ ဘာမှ မမြင်ရတော့၊ လေးကို အသာအယာ အောက်သို့ချလိုက်၏၊ထို့နောက်တော့ မှုန်ဝါးဝါး မြင်နေရသည့် မိဖုရားခေါင်ကြီး သာမ၀တီ၏ ရှေ့နားတိုးကာ ဆောင့်ကြောင့်ထိုင်လျှက် အသင်မိဖုရား ခေါင်ကြီး သည် “ ကျွန်ုပ် ဥတေနမင်း၏ ကိုးကွယ်ရာ ဖြစ်ပါတော့ ” ဟု လက်အုပ်ချီ၍ပင် တောင်းပန် လေတော့၏၊
ထိုအခါ သာမာဝတီ မိဖုရားခေါင်ကြီးသည် မေတ္တာကွန်ယက် ဖြန့်ကျက်ခြင်းကို ရပ်နားလိုက်၍ ဘုရင်မင်းကြီး “ နှမတော် ကိုးကွယ်ရာသို့သာ ကိုးကွယ်ပါ ” ဟု မေတ္တာလည်းဖက် အကြင်နာလည်းစွက်သည့် သာယာချိုမြိန်သော စကားသံဖြင့်
ကိုးကွယ်ရာအမှန်ကို ညွှန်ပြလေ၏၊
တစ်ကြိမ် . နှစ်ကြိမ် . သုံးကြိမ်သို့ပင် ရောက်ခဲ့ပေပြီး၊ ထိုအခါ ဘုရင်ဥတေနမင်း
ကြီးသည် အသင်မိဖုရားခေါင်ကြီးကိုလည်း ကိုးကွယ်ရာလို့ သိမှတ်မယ်၊ အသင်မိဖုရားခေါင်ကြီး ကိုးကွယ်နေသည့် “ အနုတ္တရ - ဗုဒ္ဓ ” ကိုလည်း ကိုးကွယ်
ရာလို့ သိမှတ်မယ်၊ နောက်ပြီး အသင်မိဖုရားခေါင်ကြီး လိုသော “ ဆုလာဘ် ” ကို
လည်း ပေးပါမယ် - ဟု အာမ ခံလေတော့၏။မာဂဏ္ဍီမိဖုရားသည် “သာမာဝတီ မိဖု ရားခေါင်ကြီးကို ပျက်စီးစေရန် ကြံ၏ ” သို့သော် သာမာဝတီအဖို့မှာတော့ “ စုတ်ရော လာဘ်ရော ” ပြိုင်တူဝင်လာသလို ဖြစ်နေတော့၏။ ( ဤပွဲ၌ သာမာဝတီသည် အောင် နိုင်သူ ဖြစ်သွား၍ မာဂဏ္ဍီသည် ရှုံးနိမ့်သူ ဖြစ်သွားရ၏ ဒေါသကို မေတ္တာက အနိုင် ယူလိုက်ခြင်းဖြစ်၏ )
ယနေ့ ရွှေနန်းတော်၌ သင်္ကန်းရောင် တပြောင်ပြောင်နှင့် သာသနာ့အရောင်ထွန်းပြောင် နေလေပြီ။ဘုရင်ဥတေနမင်းကြီးကိုယ်တိုင် ကြပ်ကြပ်မတ်မတ်ဦးစီး၍ ဘုရား အမှုး ရှိ သော သံဃာတော်အရှင်မြတ်တို့ကို ဆွမ်းဆက်ကပ်နေခြင်းဖြစ်၏၊ တစ်ရက်မက နှစ်ရက်မက ခုနှစ်ရက်တိတိပင် ဖြစ်၏။ခုနှစ်ရက်မြောက်နေ့၌ သာမာဝတီ မိဖုရား ခေါင်ကြီးကို ဘုရားရှေ့ခေါ်ကာ “ လိုအပ်သော ဆု ” တောင်းရန် ပြောလေတော့၏၊
ထိုအခါ သာမာဝတီမိဖုရားခေါင်ကြီးက “ သူသည် ရွှေ ငွေ ဂုဏ် ပါဝါ ပကာသန ”
ဘာတစ်ခုမျှ မတောင်းဆိုလိုပါ၊ဘုရားအမှူးရှိသော သံဃာတော်ငါးရာ နေ့စဉ်နန်းတော် သို့ ကြွ၍ ဆွမ်းဘုဉ်းပေးရန်သာ ပင့်လျှောက်ပေးပါ။ နှမတော်လိုချင်သောဆုသည် ဤဆု သာ ဖြစ်ပါသည်၊ဘုရင်ဥတေနသည် “ အတုလ ဗုဒ္ဓ ” ဖြစ်တော်မူသော ရှင်တော်ဘုရားကို အမြဲနန်းတော်ကြွ ဆွမ်းဘုဉ်းပေးတော်မူရန် သာမာဝတီကိုယ်စား လျှောက်ထား ပေးလေ၏။
ရှင်တော်မြတ်ဘုရားသည် “ မဟာရာဇ ဘုရားရှင်တုို့မည်သည် တစ်နေရာတည်း အမြဲ ကြွရုံးထုံစံမရှိပေ၊ လူအများသည် ဘုရားရှင် ကြွတော်မူလာခြင်းကို အလိုရှိကြသည် သာ ဖြစ်၏ ” ဟု မိန့်တောမူရင်း အမြဲကြွဖို့ ပင့်လျှောက်ခြင်းကို ပယ်မြစ်တော်မူ လိုက်၏၊ ရှင်တော်ဘုရား မကြွနိုင်လျှင် ကိုယ်စား ရဟန်းတော်များ ကြွစေတော်မူပါ ဘုရားဟု ထပ်မံလျှောက်ထား ပြန်လေ၏၊ ထိုအခါ ရှင်တော်မြတ်ဘုရားသည် “အရှင်အာနန္ဒာကို”တာဝန်ပေးတော်မူလိုက်၏
သာမာဝတီအတွက်တော့ ရတနာသိုက်ကြီး ရလိုက်ခြင်းဖြစ်၏ သူတို့အတွက် ဘာသာရေးရွှေတံခါးကြီး အချိန်ပြည့် ပွင့်ပေပြီ ၊ ပွင့်လေပြီ ၊ ပွင့်နေပြီ ၊ ထို့ ကြောင့် သာမာဝတီမိဖုရားခေါင်ကြီးတို့ အုပ်စုသည် အပျော်ကြီး ပျော်နေကြ၏၊
( သူတို့ ပျော်သလောက် မပျော်နိုင်သူမှာတော့ မာဂဏ္ဍီ မိဖုရားကြီးပင် ဖြစ်၏ )
လွတ်လွတ်လပ်လပ် ဘုရားရှင်ကို ရှိခိုးခွင့် ပူဇော်ခွင့်ရရှိသည့်အပြင် တရားတော်များကို တိုက်ရိုက် နာကြားခွင့်ရသောကြောင့် ဖြစ်၏ သူတို့သည် “ ဖူးမ၀နာမ၀ လှူမ၀ ” ဖြစ်နေကြ၏၊
(ဆက်ရန် ) ကောင်းသစ်
No comments:
Post a Comment